Tuesday, October 29, 2013

සර්ප සෙනෙහස

විෂ දළට බියෙන්
තනිකර දමා ගිය
සැපින්නක් ලඟට ගෙන
ලෙන්ගතුව කිරි පෙව්වෙමි.
කෑදරව කිරි බිවු සැපින්නද
මට පෙරළා ආදරය පෑවාය.
එයින් මසිත ද ඔද වැඩී ගියේය.
ඇය කිසිදා දෂ්ඨ නොකරාවි ‍යැයි
මම නිකමට සිතුවෙමි...

එනමුදු එක් දිනක
සර්ප සෙනෙහස වෛරයට පැරදුනි.
ඇය පෙණය පුප්පා
විෂ පිරුණු දළයෙන්
මට දෂ්ඨ කළාය...

වේදනාවක් දැනුනා වුවත්
මා පුදුමයට පත් නොවූවෙමි.
මන්දයත් කිරි පොවනා විටද
ඔබ පෙරළා දෂ්ඨ කරනා බව
මම හොඳින්ම දැන සිටියෙමි...




Friday, October 25, 2013

බාධාව

ගිහිගෙයින් නික්මෙන්න
වන ගතව තනිවෙන්න
හිමි හිමින් මෝදු වුණු
පුංචි ආශා කැකුළු
නොපිබිදිම මැළැවුණේ...

ගඩොලින් ගඩොල බැඳි
තවත් එක් ගිහි ගෙයක
වත්ත කෙළවර පුංචි පඳුරක
සුවඳවත් පොඩි රෝස කුසුමක්
පිපී නැලැවෙන නියාවෙනි...


Thursday, October 24, 2013

රස මසවුළු අතර...

ඔබ අතින් පිළිගැනෙන
කුස පුරා ගිජුකමින් ගිල දමන
රස අහර බඳුන් වල
එකතු වී තිබෙන්නේ
ඔබේ ළඳරුවන්ගේ
කුස පුරා ඇවිලෙනා
ගින්දරේ උණුසුමින්
ඔබෙ ගතින් මතුවෙනා
දහඩියේ බිඳිති බව
මේ විසල් මන්දිරේ
මැති ඇමැති දනන් හට
සිහි නොමැත සහතිකයි.













2012.01.24

තවම ඔබ නොපමාය

දැන දැනම අනතුරට - අත වනන සොහොයුරිය
මිරිඟු දිය පසුපසින් - දිව නොයන් මුවැත්තිය
දහසකුත් රකුසන්ය- ඔබව ගිල දමන්නට
තවම ඔබ නොපමාය-නියම මඟ සොයන්නට!
2012.01.04