"ඔබේ කතාව ඇසූ විට ඇය ඔබට පෙම් බඳීවි"
මා සිනාසුනා මතකයි.
එදා සිට මේ වන තුරුම
මා යම් තැනක නතරව
තවමත් සිතනවා ඒ ගැන
"කුමක්ද මගේ කතාව?"
ඔබ දන්නා මගේ කතාව.
සමහර අය මා හැර ගිය බවද
නියමිත කාලයට පෙර ?
සමහර දේ නොලැබී ගිය බවද
වුවමනාවන් දැඩිම විට?
අනේක විධ සිත් රිදුම් ද
පාවා දීම් ද පෑරවීම් ද?
කුමක්ද ඔබ දන්නා කතාව
ඔබ ඇයට කියන්නට සැරසෙන?
නැතිනම්, ජිවිතේ තනිකමද
සිනාවේ කඩතුරාවෙන් වසාගෙන ඉන්නා
ජිවිතේ බලාපොරොත්තු
කිසිවෙකුත් තේරුම් නොගන්නා
ජිවිතයේ ආලෝකය ද
සොයාගෙන ගොස් හති වැටෙන
කිසිදා මා සොයා නොඑන?
කුමක්ද ඔබ දන්නා කතාව?
අත් හැරිය යුතුදේ උරේ මත දරාගෙන
එ බර නොදැනෙන මා යන ගමනද
ඔබ දුර ඈත සිට බලා සිටිනා?
