රට දැය පිබිදු නිමල පහන - සෝම හාමුදුරුවෝ !

ගංගොඩවිල සෝම හිමියන් අප අතරින් වියෝවී වසර නමයක්  ගෙවී ගොස් ඇතත්, ගුවන්විදුලි සහ රූපවාහිනි  නාලිකා වලට ස්තුතිවන්ත වන්නට උන්වහන්සේගේ ධර්ම දේශනා අදටත් අපට නොඅඩුවම අසන්නට ලැබේ. මේ හේතුව නිසාම අපේ සෝම හාමුදුරුවෝ අපවත් වී ඇති බවත් සමහර විටදී  අමතක වී යයි. කෙසේ වුවත් සෝම හාමුදුරුවන්ගේ බණ  උන්වහන්සේ වැඩ සිටි කාලයට පමණක් සීමා වුවක් නොවේ. බුදු බණ තුලින් තරුණ ජීවිත හැඩගස්සවා ගැනීම පිලිබදව සෝම හිමියෝ නිරතුරුවම තරුණ පිරිස් දිරිගැන්වූ බව අදටත් අප මතක් කරන්නේ ගෞරවයෙනි.

පුජ්‍ය ගංගොඩවිල සෝම තෙර උපත ලැබුවේ ගංගොඩවිලදීය. වයස අවුරුදු 26ක් වු සෝම තෙරුණුවන්ගේ භාරකාරත්වය 1974දී ලංකාවේ සම්මානීත්වයට පාත්‍ර වු භික්ෂු දෙනමක් වන පුජ්‍ය මඩිහෙ පඥ්ඥාසීහ මහා නා හිමි තෙර හා පුජ්‍ය අම්පිටියේ රාහුල මහ තෙර වෙත හිමිවිය.සාමණේරනමක් ලෙස මහරගම භික්ෂු පුහුණු මධ්‍යස්ථානයට පැමිණි උන්වහන්සේ ඉහත භික්ෂුන් වහන්සේලා දෙනමගෙන් මහා සංඝයානන් වහන්සෙලාගේ ක්‍රියා පටිපාටිය ඉගෙන ගනු ලැබුහ. වර්ෂ 1976 දී උපසම්පදාව ලද සෝම තෙරුන් වහන්සේ  ප්‍රධාන පරමාර්ථය වුයේ  තරුණ පරම්පරාවේ ජීවිත ධර්මය අනුව හැඩගැස්වීමයි. උන්වහන්සේ මේ සදහා ප්‍රවේශ වුයේ "තරුණ සවිය" නැමැති සංවිධානය පිහිටුවා ගැනීමෙනි .
අවසාන කාලය තුළ උන්වහන්සේට අවශ්‍ය වුයේ බෞද්ධාගමේ අගයන් පිළිබඳ මිනිස් සිත් තුළට කා වැද්දීමයි. එපමණක් නොව ගංගොඩවිල සෝම හිමියෝ දහස් ගණන් රටවල් වල සංචාරය කරමින් බුදු රජාණන් වහන්සේ විසින් දේශනා කරන ලද ශික්ෂාපද පහ සාමාන්‍ය සරල දිවි පෙවතකට අදාළ කර ගන්නේ කෙසේද යන්න පිළිබඳව ධර්මය පැතිර වීමට කටයුතු කළහ. උන්වහන්සේ විසින් යොදා ගත් සරල අදහස් දැක්වීමේ ක්‍රියා පටිපාටියම ධර්ම දේශනා සාර්ථක විමට ඉතා වැදගත් කරුණක් විය.


 එක ධර්ම දේශනාවකදී උන් වහන්සේ ආදරය සහ පවුල් ජීවිතය ගැන කතා කරද්දීම තවත් තැනකදී මත්  උවදුරේ ආදීනව පිලිබඳ තරුණයන්ගේ අවධානය යොමු කරවූ සේක. විටකදී දෙමවුපියන්ගේ යුතුකම් සහ වගකීම් ඔවුනට මතක් කර  දෙමින් දරුවන්ටද මවුපියන්ට කීකරු වනඅයුරු කියා දුන්හ. එක වරක් සෝම හාමුදුරුවෝ මව් ගුණ පිළිබඳව දම් දෙසු අවස්ථාවක් මගේ මතකයට නැගේ. අලුත් පන්නයේ අම්මලා තම රුපය ගැන සිතමින් දරුවාට කිරි දීම ප්‍රතික්ෂේප කරන බව රහසක් නොවේ. එලෙස හැදෙන දරුවන් මවගේ උණුසුම ගැන නොදනී. එලෙස මවු උණුසුම නොදත් දරුවන් මවුපියන්ට නිසිලෙස යුතුකම් ඉටු කරාවී යයි ලැබෙන සහතිකය කුමක්ද? ඒ අතරදීම උන්වහන්සේ දරුවන් ලැබීමේදී සිසේරියන් සැත්කම් ප්‍රතික්ෂේප කරන මෑණිවරුන් අගය කරන්නටද අමතක නොකළහ. ප්‍රසුත වේදනාව දන්නා මව, උපදින දරුවාගේ අගය දනී. ඒම නිසා මවකට විදිය හැකි වටිනාම වේදනාව ප්‍රසුත වේදනාවයි. .


වර්තමානයේ බොහොමයක් පවුල් අවුල් වලට හේතුව වශයෙන් උන්වහන්සේ දුටුවේ මත රකුසා විසින් ඇති කර තිබු බලපෑමයි. දිනකට මත්  ද්‍රව්‍ය සදහා වියදම් වන මුදල ඉතිරි කරගතහොත් මසකට ඉතිරි කරගත හැකි මුදල් ප්‍රමාණයත්, එම මුදල් වලින් තම ආදරණීය දරුවන්ගේ ජීවිතය සුවපත් කර හැකි අයුරුත් පෙන්වා දුන්නේ උදාහරණ සහිතවය. උන්වහන්සේ වැඩ සිටි පන්සලට නිතර යන එන පස් දරු  දායක මහතෙක් විය. එම දායක මහතා රැකියාව වශයෙන් කලේ ලොරි රථ එලවීමයි. නමුත් එම රැකියාවෙන් සාර්ථකව තම බිරිදටත් දරුවන් පස් දෙනාටත් සැලකීමට ඔහුට හැකියාව ලැබී තිබුනේ ඔහු මත් වතුර ප්‍රතික්ෂේප කළ නිසාවෙනි.

සිංහල ජාතිය වෙනුවෙන්ද උන්වහන්සේ එඩිතරව කතා බහ කලේ කිසිදු විටකදී ජාතිවාදයට අත  නොවනමිනි.  සිංහල ජාතිය විනාස වී යන්නේ වෙනත් කිසිදු ජාතියක බලපෑමක් නිසා නොවන බවත් සිංහලයන්ගේම කුසීත කම නිසා බව ඒත්තු ගන්වන්නට උන්වහන්සේ විශාල උත්සහයක් දැරූ සේක. සෝම හාමුදුරුවෝ අපවත් වුනේ හදිසියේමය. 2003 දෙසැම්බර් 12 වන දින රුසියාවේ සෙන් පීටස් බර්ග්ස් හිදී මහරගම, විජේරාම ගංගොඩවිල සෝම හිමි රුසියන් රජයෙන් පිරිනමනු ලබන ආචාර්ය උපාධියක් ලබා ගැනීම සදහා රුසියාවට වැඩම කළසේක. එහිදී උන්වහන්සේට ඇතිවු හදිසි හෘදයාබාධයක් නිසා සෙන් පීටස් බර්ග්ස්හි රෝහලකට හදිසියේ ඇතුල් කරන ලද අතර එහිදී උන්වහන්සේගේ රෝගී තත්ත්වය වැඩිවීමෙන් වසර 56 ක ආයු වළදා අපවත් වූහ.උන්වහන්සේගේ අපවත් වීම නිසා ලාංකීය ජනතාව මහත් කම්පාවට පත් වු අතර එම අපවත් වීම සෑම කෙනෙකුගෙම සිත් තුළ සැක සංකා මතු කරන්නටද හේතු විය.


මේ සෝම හාමුදුරුවෝ අපට දුන් ඔවදන් නිසි ලෙස පිලිපදින්නට පුලුවන්නම් රට ලෝකය ජය ගැනීමට අමුතු උත්සහයක් අවශ්‍ය වන්නේද නැත. උන් වහන්සේ දුන් ඔවදන් තරුණ පරම්පරාව කොතරම් ඇද බැඳ ගත්තේද කියතොත් අදටත් ඔවුනට සෝම හාමුදුරුවෝ අමතක නැත. සෝම හාමුදුරුවෝ  අදටත් වැඩ සිටියානම් අයාලේ යන තවත් පිරිස් යහමග ගන්නට උන්වහන්සේ සමත් වනු ඇත. රට ජාතිය වෙනුවෙන් කවදාක හෝ සෝම හාමුදුරුවෝ යලිත් අප අතරම ඉපදෙනු ඇත.

"අතීතයේ ජාතියත් රටත් රකින්නට සාසනේ රකින්නට ඉදිරිපත් වෙලා දේශපාලනය කරපු බික්ෂුන්වහන්සේලා හිටිය. සමහරක් විට සමහරක් ප්‍රශ්න ඇති වෙන්න පුළුවන්. මම මේ ආත්මේ නිවන් දකින්නට අදහසක් නැහැ. මම  හිතනවා මම එතනට ගිහින් මේ රටත් ජාතියත් මේ රටේ  සමගියත් ඇති කරලා සම්බුද්ධ සාසනෙත් ආරක්ෂා කරගෙන මේ කටයුත්ත කලොත් මට නිවන් දකින්න හොඳ පින්කමක් වෙයි එක. කුසල කර්මයක් වෙයි. මම ඒ අරමුණෙන් වැඩ කරනවා.”