පිරිමින් රජකම් කරනා යුගයක අණසක පැතිර වු ක්ලියෝපැට්රා

ඈ  පිරිමින් රජකම් කරනා යුගයක ඇගේ අණසක  පැතිර  වුවාය. ලොව සුපතල නායකයින් ඇයගේ සුන්දරත්වය ඉදිරියේ දණ ගැස්සවුවාය. පිරමීඩ තරමටම ක්ලියෝපැට්රා යන නාමය ඊජිප්තුව හා බැඳි පවතී. ක්ලියෝපැට්රා යන නමින් හැදින්වෙන කාන්තාවන් කිහිපදෙනෙකු පිළිබඳවම පුරාන ඊජිප්තු ඉතිහාස කතාවල සඳහන් වේ. ඒ නමුත් මේ අතර අපට හමුවන සුප්‍රසිද්ධම  චරිතය වනුයේ දොළොස්වැනි ටොලමි රජුගේ බාලම දියණිය වන සත්වැනි ක්ලියෝපැට්රා කුමරියයි. ඇය  ක්‍රි.පූ 69 දී ඇලෙක්සන්ධ්‍රියාවේදී උපත ලද බව කියවේ. ක්ලියෝපැට්රා කුමරියට යන්තම් අවුරුදු 11 පිරුනා පමණි. ඇගේ  පියාගේ කෘර පාලනයට එරෙහිව පෙළ ගැසුණු රටවැසියෝ රජුට විරුද්ධව කැරලි ගැසීමට පටන් ගත්තාහ. නගරය අතහැර යන ලෙසට ඔහුට බල කරන්නට විය. මින් පසුබෑ  ටොලමි රෝමයට පලා ගිය අතර ඔහුට නැවතත් කිරුල පළදින්නට හැකි වුයේ ඉන් වසර තුනකට අනතුරුවයි. ඒ සඳහා ප්‍රසිද්ධ රෝමානු ජෙනරාල්වරයෙකු වූ පොම්පේගේ උපකාර ලබන්නට ඔහුට සිදුවිය. ඔහු නගරය අතහැර ගොස් සැඟවී සිටියදී ඔහුගේ රාජ්‍යය පාලනය කරන්නට සිදුවුයේ ඔහුගේ වැඩිමල් දියණි බේරෙනෙස් කුමරියටයි. මේ අතරතුරේදී එම පවුලේම තවත් සොහොයුරියක් වූ සයවැනි ක්ලියෝපැට්රා කුමරියද මියයෑම  අභිරහසක් විය. ටෝලෙමි නැවත කිරුළු පැළදු පසු ඔහු බේරෙනෙස් කුමරියවද මරා දැමුවේය. ක්‍රි. පූ. 51දී ටොලමි රජුද මියගිය අතර ඔහුගෙන් පසු කිරුළට හිමිකම් කීවේ සත් වැනි ක්ලියෝපැට්රා කුමරියයි.

පවුලේ වැඩිමහල් දරුවාට සිහසුන හිමිවීම එකල ඊජිප්තු සම්ප්‍රදායයි. ගැහැණු දරුවෙකු වුවද සිහසුනට අකැප වුයේ නැත. මේ අනුව ක්ලියෝපැට්රා කුමරියගේ  අතට පාලනය හිමි විය. එකම පවුලේ සහෝදර සහෝදරියන් අතර සිදුවන විවාහයද මෙකල සාමාන්‍ය සිරිතක් වූ අතර එම නිසාවෙන්ම ක්ලියෝපැට්රා කුමරිය අගේ බාල සොහොයුරු 13 වැනි ටොලමි කුමරුවා විවාහ කරගත්තාය මේ වනවිට ක්ලියෝපැට්රා කුමරියට වයස අවුරුදු 17කි. ටොලමි කුමරුට යන්තමින් 12 පිරුනා පමණකි. කාලයත් සමග ටොලමි කුමරු වයසින් මෙන්ම බල තන්හාවෙන්ද වැඩිණි . ඔහුගේ මිනිසුන් යොදවා ක්ලියෝපැට්රා රැජින අසල්වැසි සිරියාවට පන්නා දැමුවේ මේ හේතුව නිසාවෙන්ය. කෙලෙස ඇයව  පන්නා දැමුවත් ක්ලියෝපැට්රාද ලෙහ්සියෙන් උත්සාහය අත්හරින ගැහැනියක නොවුවාය. ඇයගේ  රාජ්‍යය නැවත ලබා ගැනීම සඳහා ඇය භාවිතා කලේ ඇයගේ  ශුර බුද්ධියත්, සුන්දර රූ සපුවත්ය. ජුලියස් සීසර් නම් රෝමානු නායකයාගේ උපකාර ලබාගත්  ඇය  බලය නැවතත් තමා සතු කරගත්තාය. ඇගේම තවත් සොහොයුරෙකු වූ 14 වැනි ටොලමි කුමරුන්ව සරණ පාවා ගත් ක්ලියෝපැට්රා ඔහු සමග බලය බෙදා ගත්තේය.
ක්ලියෝපැට්රා ටොලමිගේ අත  ගත්තද සිත තිබුනේ සීසර් කෙරෙහිය. ඒ වනවිට ඇය  සීසර්ගේ දරුවෙකු ලබන ලකුණුද පහල කරන්නට විය. සීසර්ගේත් ක්ලියෝපැට්රාගේත් පුත් සිසේරියන් උපන් පසු දරුවාද රැගෙන ක්ලියෝපැට්රා සීසර් සොයා රෝමය වෙත ගියාය. ඇයගේත්  සීසර්ගේත් පෙම් කතාව නතර වුයේ, නොසිතු මොහොතක සීසර්ගේ මිතුරෙකුගේම අතින් සීසර් මර දැමීමත් සමගයි. මේ නිසාම ක්ලියෝපැට්රාට සිසේරියනුත් සමග පෙරලා ඊජිප්තුවට එන්නට සිදුවිය. සිසේරියන් ඉජිප්තුවේ සම පාලකයා කරවීමට ක්ලියෝපැට්රා අදහස් කල අතර ඒ සඳහා මගක් සොයනු වස් ඇගේ  සැමියා වූ ටෝලෙමි කුමරුවා ඝාතනය කරවූ බවටද සැකයක් පවතී.
වසර කිහිපයකට පසුව ක්ලියෝපැට්රා සීසර්ගේ මිතුරෙකු වූ මාර්ක් ඇන්තනි සමග පෙමින් වෙලුනාය. මාර්ක් ඇන්තනිද ප්‍රකට රෝමානු නායකයෙකි. ඔහුට දාව ක්ලියෝපැට්රා නිවුන් දරුවන් ලැබූවය.  නමුත් මාර්ක් ඇන්තනි ඇය  වෙතම නොරැඳුනු අතර පෙරලා රෝමයට ගොස් තවත් රෝමානු නායකයෙකු වූ ඔක්ටෙවියස්ගේ සොහොයුරිය වූ ඔක්ටෙවියා තම බිරිඳ කරගත්තේය. කලක් අවෑමෙන් බලයට ඇති ආශාව වැඩි දියුණු වත්ම මාර්ක් ඇන්තනි නැවත ක්ලියෝපැට්රා සොයා ආවේය. ඒ තනිවම නොවේ. දේශපාලන සම්බන්දතා රාශියක්ද ඔහු සමග රැගෙන ආ ඇන්තනි ක්ලියෝපැට්රා සමග අතිනත ගත අතර, ක්ලියෝපැට්රා ඔහුට දාව තවත් පිරිමි දරුවෙකු වැදුවාය. දරුවන්ගේ ආශිවාදයත් සමග ඉජිප්තුවත්, ඊට අමතරව සයිප්‍රස්, ක්‍රීට් සහ සිරියාව වැනි රාජ්‍යයන් කිහිපයකම ඔවුහු බලය පැතිරුවෝය.

ඇන්තනිගේ ක්‍රියාකලාපය ඔක්ටෙවියන්ගේ කෝපයට හේතු විය. රෝම සෙනෙට් සභාව ඊජිප්තුවට එරෙහි යුද්ධයකට පොළබවා ගන්නට ඔහු සමත් විය. යුද්ධය ඇරඹුණු අතර සටන් බිමේදී ක්ලියෝපැට්රා දිවිනසාගත් බව කියවෙන වැරදි තොරතුරක්   හේතුවෙන් කම්පාවට පත්වූ මාර්ක් ඇන්තනි සටන් බිමේදීම සිය දිවි තොර කරගත්තේය. ඔක්ටෙවිඅන්ට යටත් වීමට අකමැති වූ ක්ලියෝපැට්රාද වස වර්ගයක් ශරීර ගත කරගනිමින් සිය දිවියට ආයුබෝවන් කියුවාය.
ක්ලියෝපැට්රාගේ ජීවිතය වටා ගෙතුණු කතන්දර, චිත්‍රපට සහ නාටක එමටය. මේ අතරින් විලියම් ශේක්ෂ්පියර් අතින් නිමවුණු ඇන්තනි සහ ක්ලියෝපැට්රා නාටකය මිනිසුන්ගේ හදවත් වලට සමීප වුයේ ක්ලියෝපැට්රා ඊජිප්තු ඉතිහාසයේ ජනප්‍රියම කාන්තා චරිතය බවට පත් කරවමිනි.